Adventstur

Siste søndag i advent fekk eg og Merete oss ein fin tur på sjøen. Eigentleg var det tenkt som ein klubbtur, men alle hadde nok med seg og julestria, så då vart det berre oss to.

I knallflott vintervær starta vi ut ved Leikong tidlig søndag føremiddag. Knapt eit vindpust på sjøen! Ingen av oss var særlig gira på langtur, så vi sikta oss mot Kjeldsund. Og litt for kladt til at ein lunsjpause på land var aktuelt. Sopass kaldt var det faktisk, at eg mista følelsen i fingrane allereide før vi hadde passert Budaneset. Heldigvis hadde Merete nokre varmeposar eg fekk låne - dei hjalp godt! Minusgrader i fuktig sjøluft kjennes langt kaldare enn i tørt innlandsklima.

Uansett årstid er det no alltid lekkert å padle når det er vindstille, sjølv om det er kaldt. Merete er over gjennomsnitt oppteken av å ta bilder så dette var midt i blinken for ho. Det gir tid til å snirkle loitt, og det er jo alltid kjekt. Innover mot Kjeldsund var det såvidt byrja å legge seg små isflak på sjøen hist og her, og det var kaldt å padle i skuggen. Men på denne tida av året med mykje fjell på alle kantar, er det ikkje berre enkelt å padle i sola heile tida, men vi gjorde no så godt vi kunne.

Vi tima turen ganske bra med tanke på lyset. Returen vart flott i eit aldeles magisk vinterlys, men då var eg blitt sopass kald at eg ikkje orka tanken på å ha fingrane ut av vottane for å ta bilde. Kl 14 var vi på land att, og sola var i ferd med å takke for seg bak fjella, på denne aller kortaste dagen i året. Kald, men magisk tur i vinterlys denne gongen altså!

Stille morgon i Kjeldsund

Det er lenge sidan Mona og eg har padla i lag, men mot slutten av ferien fekk vi oss ein tur. Eigentleg hadde vi tenkt å fare utover og rundt Vattøya i morgonsola, kose oss og kike utover havet. Men når eg stod opp låg havet inntylla i skodde. Som ikkje var meldt. Då har ein i grunn to val: gi seg på det eller dra til Kjeldsund.

Vi gjorde det siste. Og heldigvis var det skoddefritt der inne. Litt lågt skydekke, men stilt og framleise fin nok temperatur til å droppe tørrdrakta. Og skulle skodda sige innover er det kort veg til trygg grunn over alt.

Blikkstille!

Det er alltid kjekt med ei rast på land, så vi padla over mot Haddal-sida og fann oss ei lun vik der. Dit hadde og knotten funne fram, så når det gjekk frå relativt blikkstille til absolutt heilt blikkstille pluss yr, måtte vi gi oss. men då hadde vi no fått te og tylla i oss kokekaffi (absolutt eit must på tur) ei god stund.

Snart lunsj!

Lunsjpause med kaffi og sjokolade frå Longyerbyen

Med knott rundt øyrene var det godt å komme seg i kajakken att. Vi tok sjølvsagt vegen via holmane i Kjeldsund. På fjøre sjø er det nokre stader det ikkje går å padle mellom, så då får ein ta vegen rundt - eller drage kajakkane over. Med tang og tare å drage på gjekk det ganske lett!

Når ein ikkje gidd å padle rundt....

Kjeldsund er fint å sulle rundt i med plenty holmar å padle rundt og mellom, men superlangt vert det ikkje. Mona var spent på kor godt padlinga gjekk ettersom det har vore landligge for kajakken eit par år, men det gjekk heilt supert! Turen vart på 7,5 km og ein heilt super tur tidleg ein sundag formiddag!

Tilbake til start.

(Og ja - eg såg deg...)

Rundtur Leikong-Kjeldsund

Godt i gang med med å få opp padleformen er eg ganske gira på å få fleire kilometer på vatnet. Det er finevêr og lite vind, og Flåvær lokkar der ute! Turinvitasjon vert sendt ut og heldigvis er folk gira på tur. Men som alltid - når det har vore fint vêr fleire dagar i strekk så kjem havtåka brått på og Flåvær utgår.... 

Dei som held til i indre strok har ikkje mykje lyst utover i skoddehavet, og vi som held til i ytre synes fjordpadling i Ørsta er lite forlokkande. Men vi vil jo ikkje padle i tåka heller. Kjeldsund er litt lite, Eiksund har eg akkurat vore i, så kva er alternativet då liksom? Merete og eg grunnar litt på det, heilt til Merete foreslår at vi kan padle frå Leikong til Kjeldsund og tilbake, det vert ein akkurat passe lang tur!

Og som sagt så gjort. Det vart ein fantastisk tur i strålande kveldssol og godt selskap. Tåka heldt seg i ytre strok, vinden stilna heilt av i kveldinga og det vart skikkelig zen-kjensle og godt for sjelen. Og eg fekk ein ny tur inn på Lista mi som jo alltid er kjekt. Overraskande fin, og om ein synes berre Kjeldsund vert for kort så kan eg anbefale denne varianten!

Tusen takk for turen - sjåast snart på vatnet att!!

Ved Leikong. Ulsteinvik i det fjerne.

Det blir litt snirkling ved Leikong og - her ved Nykreimsholmen

På leit etter eit kvileskjèr

Midtsommartendenser i mai!

Snirkling ved Furøya

Langs Kjeholmen

Snirkling i Kjeldsund

Det er s lekkert, så lekkert!

Seglmerket i Kjeldsund. På retur.

Leikong

Kveldssol i retning Rovdefjorden

Ulsteinvik - Kjeldsund

Det har kort sagt vore dritvèr i nordvest i sommar. Reg og regn og atter regn. Og vind. Ikkje har eg fått gjort det eg skulle på huset og ikkje har det vore padlevèr. Dei få dagane som har vore med brukbart vèr, dei har då stort sett gått med til klipping av plen og hagearbeid. Det gror sjøv om det regnar! Så kva er løysinga? Jau, padle sjølv om det bøttar ned når vinden i det minste ser ut til å være handterbar.

Så då gjorde eg det. Med fine temperaturer (20+) og lovnad om opphald i litt ut over dagen, så vart det padletopp og shorts. Sommar er sommar og tørrdrakt vert alt for varmt. Det er jo eit pluss om ikkje anna. Planen var å padle til Skreddarholmen og sjå om der er brukbart for telting og tilbake til Ulsteinvik att.

5 minutt etter eg har lagt frå land kjem regnet....

Yr har ikkje akkurat vore presis i sommar, så opphaldsværet som er lova kjem i veldig korte periodar. Det såg lovande ut ei ri, men kor lenge var Adam i paradis?

Opphald og litt snirkling mellom holmane nord for Dimna.

Ved Dimnaneset og fri sikt mot Herøybrua.

Ikkje veldig lenge. Rett etter eg hadde passert Dimnaneset vart det både regn og vind. Akkurat då angra eg litt på at eg ikkje tok på meg tørrdrakta. Her har vind og bølger nesten  fritt leide inn frå vest med ein del grunner eg må passere, så det kan bli litt krapp og rotete sjø. Heldigvis vart det ikkje så gale, men nok til at eg ikkje prioriterte å sleppe åra for å ta bilde. Etter 20 minutt med intens jobbing kom eg såpass i le for vind og bølger at eg kunne fiske fram kamera att.

Skreddarholmen.

Borte ved Skreddarholmen var det å finne ein god plass å gå i land for beinstrekk og klesskifte. Etter ein time med regn og vind byrja eg å bli sånn passe kald og våt - men heldigvis hadde eg vet nok til å ta med både tørrdrakt og ullklede. Nista hadde eg sjølvsagt reist frå, men det freista no ikkje særleg å sette seg til for å ete uansett. 

Rekognosering ved Skreddarholmen. Grått og vått.

Eg padla litt rundt før eg fann ein høveleg plass å gå i land. Nokon potensiell plass å telte var ikkje mogeleg å sjå frå kajakken, og våt og kald som eg var freista det ikkje å sjå meg om lengre inn på holmen heller. Det får bli ein anna gong. Eg fann meg ei lita bot under eit tre der eg kunne stå å skifte, men særleg til ly vart det no ikkje. Og prøv å trekke på det ullnettning og tørrdrakt på ein våt kropp. Det går ikkje akkurat fort....

Kort pause på land

Med litt varmare klede på og sjokoladepåfyll var det eiegntleg berre å snu og padle attende. Noko eg eigentleg ikkje var særleg lysten på, vind og regn og kjedeleg strekning attende tatt i betraktning. Å fortsette vidare inn til Kjeldsund var eg mykje meir lysten på. Mindre eksponer, og så vert det totalt ein meir variert tur. Som sagt så gjort - eg ringde heim og tinga på henting før eg fortsette mot Kjeldsund.

...og regnet berre fortsette...

Frå hav til fjordlandskap.

Inn mot Dragsundet.

Dragsundbrua

Kjeldsund

Eg byrjar å få god kontroll over dette området frå kajakk no, og det er litt kjekt. Kanskje ikkje verdas mest spennande padleområde, men på den andre sida er vi rimelig godt bortskjemde her på mine trakter så eg kan vel ikkje klage. Det vart jo i grunn ein fin tur, trass i regnværet! Men om det er mogeleg å telte på Skreddarholmen gjenstår enno å sjå.

Kosetur i Kjeldsund

Sjølv om påske og finevær for ange er synonymt med skitur, er det å padle på denne tida av året kanskje noko av det finaste eg veit. Sjøen er som oftast krystallklar og lufta klår og skarp. Då er det kjekt å få høve til å padle med nye folk. Nokre kjente, nokre ukjente. Og kjekt å treffe folk eg kun kjenner frå den digitale verda på ordentlig.

Sulling i Kjeldsund er ein fin plass når hovudmålet er å være sosial. Praten går ofte fortare enn åretaka, så det er ikkje om å gjere at det er for langt. Men det må være langt nok til at det er fint å legge inn ein god rast, og i området rundt og i Kjeldsund er det fleire fine plassar å gå på land. Men først tok vi oss ein runde for å kikke oss omkring.

Speilblankt i Kjeldsundet

Vi tok ein snartur inn i Makrellvågen. Rjåhornet rett forut.

På veg tilbake mot Kjeldsundet att.

Den gamle røykeriet i Kjeldsund

Her har vi runda Hestholmen og er på tur sørover igjen.

Det er berre lekkert!

Vi kryssa over mot Furøya snirkla litt der før vi pausa. Her heiter det også Kjeholmen...

Kokekaffe på bål og godis er obligatorisk på kosetur.

På heimveg snirkla vi meir. Bakarholmen th og rett fram.

Det er utruleg kor fort tida går når ein er på sjøen i godt selskap. Området rundt Kjeldsund er ikkje frykteleg stort, men med all snirklinga kom vi påå i 9,3 km målt i ettertid på kartet.Med grilling, god prat undervegs og nye bekjentskaper vart dette ein strålande påsketur på sjøen! Takk for turen - og på gjensyn!