Det nærmar seg ferie og vi fer snart til kvar vår kant. Lene og eg er sugne på Hoddevika. Helg vert sett av og agnet lagt ut i von om at fleire vil bli med. Det nærmar seg avreise og det er meldt stilt ved Stadt. Fredagen er det håp for, men eg startar ikkje ferie før på mandag. What to do? Etter ei kjapp rådslaging med meg sjøl og avklaring med sjefen tek eg mandag på fredag og omvendt. Poloen vert stua til randen med utstyr og ungar, og eg kryssar fingrane for at takstativet held heile vegen og så avgarde.
Det er sol og akkurat så mykje bølger som vi treng for å ha det kjekt når vi kjem fram. Og kjekt er det. Magemusklane er og i feriemodus- likar ikkje. Men eg får nokre fine surfar der eg faktisk har kontroll heile vegen. Så er det grilling og sosialt medan den eine etter den andre kjem sigande. Vi kosar oss i kveldinga, nyt solnedgangen og at det i det heile er mogeleg å sitte ute i kveldinga utan å fryse.
Laurdag og dørge stilt utpå. Mildrid og eg startar økta med å hanke inn ein surfar på SUP-board på veg ut til havs. Ikkje at han var på avvege eller noko, neidå- han hadde berre lyst til å sjå grottene han og tok ein liten pause frå surfekurset. Vi tok han att sånn ca 2,5 km frå stranda. Når det er vindstille er det i og for seg ikkje noko problem, men på den breide fjøla der ville han få problemer om det bles litt opp. Dagen før kom det nokre uanmeldte rosser på 6-8 ms. Eg tippar han ikkje ville likt det. Det ville nok ikkje surfeinstruktøren likt heller for å seie det slik......han vart litt stressa når vi gorde han merksam på han som var på veg til havs.
Med litt venting og tolmod vart det litt surfing likevel. Og i grunn flotte forhald til litt fotografering etterpå. Eg kan ikkje seie anna enn at eg likar det nye objektivet godt. Det eg ikkje likte var at tørrdrakta gjekk opp i liminga....Men Hoddevika er alltid kjekt. Sjøl om bølgene ikkje var dei beste, drakta rakna, batterikapasiteten til GoProèn svikta og eg ikkje fekk med meg grottesafari på søndag. Men det er mykje godt selskap kan bøte på og takk for det! God sommar!