...eller teltur i kuling, alt ettersom. Kneet syt og klagar og eg må stå over den planlagde turen til Grotli på ski. Kva finn ein på då når det er palmehelg, og gemalen og ungar er bortreist? Jobbe? Burde vel, men haudet kokar etter intense dagar og eg treng LUFT! Mykje luft.
Som i kuling for eksempel? Mildrid meiner at meldingane er nett passe til å trene på turpadling (meldingane sa 10-12m/s laurdag og 12-14 søndag- altså liten til sterk kuling). Trene på å slå leir i dritver, trene på vindpadling og i det heile finne ut kor langt komfortsona strekkjer seg. Eg pakkar og hiv inn på postafen før eg set kursen mot start i Eiksund, telting på Kvitøya og vidare til Ulsteinvik.
Det startar roleg medan det bøttar ned. Så aukar det på med vind og eg får teste meg i både medsjøpadling og motvind. Begge deler går greitt, og vi kjem til leiren på Kvitøya akkurat tidsnok før han aukar på.
Eg sovnar som ein stein, men vaknar på natta av at det riv godt i teltduken. Og det gjer det lenge......Eg har tinga på vekking frå morgonfuglen i naboteltet (noko ho held) og vert invitert på frukost- kjekt med slike naboar! Dagens padleplan vert lagt mens vi et og sjekkar yr.no. Det skal blåse opp mot 14 m/s frå kl. 12, så vi startar tidleg og går for "indre lei" mot Ulsteinvik via Straumane. Då slepp vi kanskje den argaste vinden, og kan gå på land fleire stader langs ruta om ikkje.
Medsjøpadling kan eg like- kilometrane går unna i ein fei- juhuu kor det er kjekt å surfe seg fram her i livet!! Men alt har ein ende- siste stykket får vi vinden midt i fleisen- truleg desse 14 m/s som vart meld. Og sidebølger og sluddregn. Eg trur komfortgrensa mi går omtrent her. Heldigvis er det kort att til båthavna, og eg klarer å kjempe meg fram det siste stykket.
Kort, men effektiv tur. Mykje læring og mykje morro. Bølgene var for små og eg var ute i dei i for kort tid til å teste sjøsjuka for alvor. Skikkelig motvind vart det berre over kortare strekk, men kjekt å måle kreftene likevel. Takk for flott tur Mildrid- gler meg til neste gong!
Og som vanleg- det ser alltid ut som det er flatt av på bilde.... :/