Rundt Hatløya - stille før stormen

Om ikkje sommaren vart bra i år kunne ein jo håpe på ein fin haust, men den gong ei. Regnet vil ingen ende ta, så når det ført vert opphald grip ein sjansen til tur før den meldte stormen som skal komme tek laus. Og det er faktisk "stille før stormen" når eg legg utpå. Speilblankt faktisk! Litt variasjon på turmålet må til, så denne gongen padlar eg rundt Hatløya MED klokka, og ikkje MOT slik eg brukar.

Det er deilig å være på sjøen i dag. Mildt og fint og stilt. Båtlivet har gitt seg for sesongen, og det er berre nokre få av oss som framleid badar. Denne gongen måtte søndagsbadet vike for padling - ein rekk ikkje med alt.

Lampa på Boholmen (helt tv i bildet) og Dimna sett frå uvant hald

Eg siktar meg inn mot Kloholmane der det er ein fin lagune og potensiell teltplass eg må sjekke ut ved høve. Midtfjords finn eg ein daud fugl av noko slag. Eg er ikkje spesielt god på slikt, men ut frå bilete på det store internettet synes eg det liknar på ei alke, kanhende ungfugl? Framme ved Kloholmane ser eg det sit ei stor ørn i ein busk, men den lettar og forsvinn når eg nærmar meg fjellveggen. Eg burde lære meg meir om fuglar for det er alltid kjekt å vete kva ein ser på sin veg, men tippar det er ei havørn.

Kan det være ei alke, nokon som veit? Heldigvis ikkje teke sin daud av nylontau, men trist likevel

Havørn (?) ved Kloholmen

Håkonsholmen bakerst til høgre.

Forbi Klohomane og inn mot Borgarøya fekk eg lyst å kike meg litt rundt der eg ikkje brukar å padle. Det kan jo være greit å variere turen litt. Kanskje går det å snike seg mellom det som ser ut som to holmar lenger inne og. På vegen dit padlar eg forbi eit naust og eit annekse som ein kollega har teikna. Det riggar så fint både i landskap og med dei gamle husa synes eg, gamalt og nytt i skjønn foreining. Litt lengre inne håpar eg på å kunne snirkle inn i mellom og over mot Borgarøya med det gjekk ikkje gitt ikkje. Berre å snu og padle ut att!

Innsida av Hatløya. Sjeldan eg padlar attmed land her.

Litt arkitekturbefaring må til. Nytt naust og anneks teikna av kollega Ingvill.

Gjekk visst ikkje an å padle rundt her....Full stop!

Eg gidd sjeldan gå i land når eg er ute åleine på denne runden sjølv om eg ALLTID har med ein lite matbit og noko attåt. Ved Borgarøya var det folk, så då droppa eg det i alle fall, og nista vart heller ete om bord med kakao servert på dekk før eg stakk nasen ut mot havet att. Men kakaoen smakte like godt for det.

Handelsstaden på Borgarøya - også frå ein annan vinkel.

Yttersida av Hatløya er det absolutt finaste stykket på heile turen uansett kva for veg, men eg må tilstå eg likar spesielt å runde frå sør og så vestover. Lyset denne vegen er berre heilt nydeleg.

Ut mot havet att. Alltid like fint å runde sørenden av Hatløya.

Roppehornet og Veten ut mot Flø i syningom.

Siste stopp før kryssinga over mot Osnessanden att er Håkonsholmen. Dette er ei lita perle og heldige er dei som får bruke denne idyllen. Eg trur heilt sikkert eg hadde blitt fastbuande her ute om eg hadde eigd det sjølv. Så kunne eg hatt nokre høner og eit par sauer, heimekontor og berre dra til  by`n når eg trengte litt melk og kaffi og slikt. Men eg må nok nøye meg med telt enn so lenge...

Idyllen på Håkonsholmen litt meir på kloss hald.

Tilbake til Osnessanden

Siste del av turen er litt kjedelig, men været er fint og sjøen enno speilblank. Og då er det ikkje so værst likevel. Fin tur vart det i alle fall og kjekt å få lufta seg litt før stormen kjem.

Sjønær 2024

 Årets Sjønær på Runde er den 3. i rekka. Og i år som i fjor skulle klubben stille på Sunday Funday med prøv å padle. Eg skulle jo helst også prøvd meg på litt dykking for det er lenge sidan sist, men vi hadde jo lova å stille...I fjor var eg med heile helga - i år passa ikkje det så godt, men eg fekk med meg foredrag og middag på laurdagen. Det er heilt utruleg kva dei har fått til - eg likar opplegget kjempegodt så litt kjipt å ikkje få med meg heile helga, men litt er betre en ingen ting!

I alle fall - i år måtte eg og til pers med å køyre kajakkhengaren.... Eg har ikkje allverden med erfaring ut over å køyre med den tilhengaren eg har sjølv. Dessutan det er vel akkurat i grenseland for kva eg har lov til. Men må man så må man, og vi skulle grytidleg avgarde i glesgrente strok såe.....Men det gjekk no greit både til og frå.

Anne-Mette er klar for innhogg av folk...

Vi var litt spente på kor monge som ville dukke opp. På slutten i fjor kom det eit heilt rush av både store og små, men i år var det berre nokre småtassar som ville prøve seg. Men dei få som kom kosa seg! Det spørs om vi ikkje vert litt usexy, samanlikna med ball, SUP, fridykking og coasteering......

Mykje småfisk å sjå!

Mens vi venta på potensielle "kundar" tok vi oss ein runde for å sjå på kva dei andre dreiv på med. Fridykking veit eg er gøy, men til neste år har eg lyst å prøve coasteering - det ser innmari kjekt ut. Der dei holdt på var det og fine brott å leike seg i for oss med kajakk. Vi fekk ein liten surf kvar over eit sva, men utan hjelm tok vi det litt forsiktig og lot det bli med denne eine...

Fridykking

Coasteering. Her var det og fint å padle over skjæret th 

Hege og John fekk seg og ein tur medan dei venta på "kunder".

Litt liten interesse for kajakkpadling i år altså. Og kanskje er det ikkje "kom og prøv kajakk" som er greia på Sjønær. Vi klarer ikkje konkurrere med dei andre aktivitetane. Så her må vi nok i tenkeboksen til neste år! Det var no kjekt likevel. Eg (som einaste som padla kajakk fekk med meg litt av laurdagen og. Foredrag på ettermiddagen av folk frå rundt om kring i verda som studerar livet i havet, og som av ulike grunnar (ofte kalt tilffeldigheit) har ei eller anna kopling opp mot Miljøsenteret på Runde. Under middagen på kvelden (fantastisk god mat!!) vart det og høve til å prate og bli kjent med andre som og bryr seg om havet. Ein kan verte mørkeredd over alt ein les skjer med naturen no fordi vi ikkje har hatt vett til å trø forsiktig, men å høyre på fagfolk som vel å være optimistiske for framtida, gir jo litt håp!

Vel blåst for Sjønær 2024 og Miljøsenteret på Runde!

Med HKK rundt Nautøya

I byrjinga av September holdt Anne-Mette og eg ein tur for HKK. Sol og fint vær og greier. Det har vore lite turar i HKK-regi siste åra, og det tenkte vi å gjere noko med. Men vi byrja forsiktig med ein lågterskertur for dei som ikkje har padla så mykje. I tillegg til Anne-Mette og meg var der tre stykk som møtte opp. Litt labert på ein solfylt dag kaskje, men det er mogeleg folk har gitt oss litt opp?

For litt variasjon tok padla vi på yttersida av sjølve Herøya.

Det var aldeles nydeleg ute på sjøen, og med så lite sommarkjensle som har vore her i år, set ein ekstra stor pris på slike dagar. Vi nikosa oss! Padla på innsida av Petterholmen og før vi runda Herøya på nordsida og kunne sjå heilt ut til Flåvær. Det er ei stund sidan eg har vore der ute, så det er snart på tide.

Nydeleg vær! Bergsøya i bakgrunnen

Finaste utsikta eg veit heromkring - Flåvær!

Så er det på tide å padle til padlehuken for pause. Men før vi gjekk på land ville Arnfinn (82!!) freiste rulla - og det får han sjølvsagt til med glans! Skvett opp att som ein kort og får det til å sjå så innmari lett ut! Eg har har ikkje rulla på eit år (?), kanskje meir, og tenkte å teste etter pausa. Så var det å håpe på at motet holdt så lenge.....

Her rundar vi innover att i retning padlehuken.

Arnfinn sluttar aldri å imponere. Her gjer han seg klar for ei rulle

Og jaudå! Han kom seg opp.

Vi tok oss ein lang og god pause på land før vi vende nasen heimover. Men eg måtte sjølvsagt teste rulla først. Og eg fekk det til med eit nødskrik! Ingen fotodokumentasjon, men plenty med vitner - det får halde. Ettersom det ikkje var ei særskild god rulle, stoppa eg med denne eine. Det som ikkje funkar har ein tendens til å sette seg fast i tankane, så eg valgte heller å sjå på det som ein siger - dog med forbetringspotensiale.

Framme ved padlehuken og det er tid for ein beinstrekk

Her er vi på innsida av Vedøya på tur heim att.

Arnfinn med Ulsteinvik i det fjerne.

Vi tok med oss det vi kunne finne av holmar for å gjere turen maksimalt lang. Klombraholmen og Vedøya vart runda før vi til slutt kunne passere på inssida av Nautøya og tilbake til naustet att! Alt i alt ein finfin tur på vel 6 km, så får vi sjå om det ikkje vert fleire turar i klubbregi.

Ulsteinvik - Kjeldsund

Det har kort sagt vore dritvèr i nordvest i sommar. Reg og regn og atter regn. Og vind. Ikkje har eg fått gjort det eg skulle på huset og ikkje har det vore padlevèr. Dei få dagane som har vore med brukbart vèr, dei har då stort sett gått med til klipping av plen og hagearbeid. Det gror sjøv om det regnar! Så kva er løysinga? Jau, padle sjølv om det bøttar ned når vinden i det minste ser ut til å være handterbar.

Så då gjorde eg det. Med fine temperaturer (20+) og lovnad om opphald i litt ut over dagen, så vart det padletopp og shorts. Sommar er sommar og tørrdrakt vert alt for varmt. Det er jo eit pluss om ikkje anna. Planen var å padle til Skreddarholmen og sjå om der er brukbart for telting og tilbake til Ulsteinvik att.

5 minutt etter eg har lagt frå land kjem regnet....

Yr har ikkje akkurat vore presis i sommar, så opphaldsværet som er lova kjem i veldig korte periodar. Det såg lovande ut ei ri, men kor lenge var Adam i paradis?

Opphald og litt snirkling mellom holmane nord for Dimna.

Ved Dimnaneset og fri sikt mot Herøybrua.

Ikkje veldig lenge. Rett etter eg hadde passert Dimnaneset vart det både regn og vind. Akkurat då angra eg litt på at eg ikkje tok på meg tørrdrakta. Her har vind og bølger nesten  fritt leide inn frå vest med ein del grunner eg må passere, så det kan bli litt krapp og rotete sjø. Heldigvis vart det ikkje så gale, men nok til at eg ikkje prioriterte å sleppe åra for å ta bilde. Etter 20 minutt med intens jobbing kom eg såpass i le for vind og bølger at eg kunne fiske fram kamera att.

Skreddarholmen.

Borte ved Skreddarholmen var det å finne ein god plass å gå i land for beinstrekk og klesskifte. Etter ein time med regn og vind byrja eg å bli sånn passe kald og våt - men heldigvis hadde eg vet nok til å ta med både tørrdrakt og ullklede. Nista hadde eg sjølvsagt reist frå, men det freista no ikkje særleg å sette seg til for å ete uansett. 

Rekognosering ved Skreddarholmen. Grått og vått.

Eg padla litt rundt før eg fann ein høveleg plass å gå i land. Nokon potensiell plass å telte var ikkje mogeleg å sjå frå kajakken, og våt og kald som eg var freista det ikkje å sjå meg om lengre inn på holmen heller. Det får bli ein anna gong. Eg fann meg ei lita bot under eit tre der eg kunne stå å skifte, men særleg til ly vart det no ikkje. Og prøv å trekke på det ullnettning og tørrdrakt på ein våt kropp. Det går ikkje akkurat fort....

Kort pause på land

Med litt varmare klede på og sjokoladepåfyll var det eiegntleg berre å snu og padle attende. Noko eg eigentleg ikkje var særleg lysten på, vind og regn og kjedeleg strekning attende tatt i betraktning. Å fortsette vidare inn til Kjeldsund var eg mykje meir lysten på. Mindre eksponer, og så vert det totalt ein meir variert tur. Som sagt så gjort - eg ringde heim og tinga på henting før eg fortsette mot Kjeldsund.

...og regnet berre fortsette...

Frå hav til fjordlandskap.

Inn mot Dragsundet.

Dragsundbrua

Kjeldsund

Eg byrjar å få god kontroll over dette området frå kajakk no, og det er litt kjekt. Kanskje ikkje verdas mest spennande padleområde, men på den andre sida er vi rimelig godt bortskjemde her på mine trakter så eg kan vel ikkje klage. Det vart jo i grunn ein fin tur, trass i regnværet! Men om det er mogeleg å telte på Skreddarholmen gjenstår enno å sjå.

Fine dagar i Nordvest

Dag 1 - på leit etter teltplass

Lene og eg er på padlesafari på Nordøyane - altså øyene som ligg nord for Vigra og Ålesund. Planen er å utforske den nordligaste delen, nemleg området nord for Finnøya. Men planar er ein ting, kva som er mogeleg er noko anna. Det bles rett og slett for mykje. Kva gjer vi då? Vi kan alltids gå oss ein tur og så reise heim att, evt. satse på betre padleforhold neste dag. I såfall må vi finne ein dugandes teltplass for kvelden - ikkje alt for langt frå bilveg og i le for nordavinden.

Det er lettare sagt enn gjort. Det er ingen ting å finn på korkje Lepsøya eller Haramsøya. Anten er der hus, hytter eller så er det naturvernområde. Kva gjer vi no? Reiser heim? Tek inn på ei rorbu? Og kor er det i såfall best å telte med tanke på padling dagen etter? Vi treng mat før vi er beslutningsdyktige og returnerer til Lepsøya der vi sette att eine bilen.

Lunsj i det fri mens vi funderer på kva vi skal gjere

Etter litt mat og blodsukker på veg opp, konkluderer vi med at resten av dagen får nyttast til fots. Det bles godt, men været er likevel for fint til å ikkje nytast. Ute på Haramsneset har eg sett bilete av ei kul grotte attmed sjøen, og ettersom vi er i nærleiken dreg vi dit. Nøyaktig kor denne grotta er veit vi ikkje, så vi køyrer til endes av vegen og går langs fjøra og leitar. Under vegs finn vi mykje artige steinformasjonar.

Jettegryte på jettegryte

Det er sterke krefter i sving som formar fjell på dette viset

Ser du trollkjerringa?

Det vert litt klyving langsmed berga, og vi er litt spente på om vi finn fram. Men jaggu - til slutt finn vi ei ørlita sprekk i fjellet der det må være. Det er omtrent maks flo og uråd å få seg ein kikk utan å verte blaut. Men framsynte som vi var tok vi på oss sko og tøy som toler å bli vått. Eg vassar ut til knes, men når bårene slår inn i grotta rekk vatnet plutseleg opp til stussen, og eg er ikkje halvegs inne ein gong. Vi gir oss på det og ruslar ut til lykta ytterst ute på neset og returnerer heller eit par timar seinare når sjøen har trekt seg litt meir attende. Neste gong får vi time det litt bedre, men det var absolutt verdt eit besøk. Sagnet fortel at denne grotta var kyrkja has Bård i Neset - ein rørsleg og sterk kar. Du kan lese meir om Bård i Neset her her og forteljinga som ligg bak dei kule steinformasjonane vi såg.

Kyrkja has Bård i Neset på flo sjø.

Her har sjøen falle litt, men ikkje maks fjøre enno

Kvelden nærmar seg så det er på tide å finne ein høveleg teltplass til natta. Vi leitar vidare på Skuløya/Flemsøya (ingen grunn til å verte einige om eit navn....!) og Fjørtofta før vi gir oss i Mykjebusthavna på Harøya. Vi har sett ein og anna plass der det kaaanskje går å sette opp eit telt, men ingen ting som peikar seg ut. Til slutt finn vi oss ein høveleg plass i ei båthamn i le for nordavinden og kan ta kvelden.

Dagens teltplass med utsikt til morgondagens padlemål

Lene i solnedgang

Dag 2 - Uksnøyholmane

Vinden gir seg ila natta, og eg vaknar til blikkstille hav og sol! Yr er på vårt lag, så det teiknar til å bli ein fin padledag. Og det vert det! Etter ein lang frukost og kaffi på perkulator, gjer vi oss klare til dagens turmål, nemleg til Uksnøya oh holmane ikring.

Kaffi er best på perkulator! 

Uksnøya er den einaste av øyene her ute som har vore busett, men det er eit vell av øyer og skjer her ute som til saman dannar ein skjerma lagune. Her er mykje å padle mellom, men det er grunt og kor det er mogeleg å padle varierer med flo og fjære. Vi startar med straumpadling (artig) på veg ut til Måværet, siktar oss vidare inn på Høgværholmen, snirklar litt rundt omkring før vi finn ein fin plass å gå i land. Her er aldeles nydeleg. Det er grunt over alt på innsida og liknar til forveksling på bilder frå Helgelandskysten. Vi et, badar og kosar oss og nyt det som er av sommarkjensle.

Her kan vi såvidt skimte husa uteb på Uksnøya i bakgrunnen. 

Lekkert smekkert! Øyhopping Sunnmøre-style

Ut å smake på storhavet

Kven treng å dra til Helgelandskysten når vi har det i eige fylke?

Ukjent bergart, men dei raude flekkane er granat.

Endeleg litt sommar og nakenbading.

Medan vi har kost oss på land har det flødd sopass mykje at det no er mogeleg å padle rundt sjølve Uksnøya. Her har truleg budd folk heilt frå middelalderen. Opphaveleg var det eit bruk her, seinare vart det del i to. Dei hadde både melkekyr, sauer og hest, dyrka korn, dreiv med fiska. Sal av hummer og smør gav inntekt og losverksemd var ei god attåtnæring. Dei var relativt godt stilt dei som budde her! I dag er det villsauer her ute, og husa på øya vert framleis teken godt vare på.

Knutgarden. Huset er i mur og eit sokalla Smith-hus

Det går akkurat å runde Uksnøya på nordsida i kajakk på flo sjø

Rasmusgarden - her driv dei med villsau.

Med floa vert det mogeleg å padle enno fleire stader

Etter å ha sosa rundt på innsida, tek vi utover til Marøy som siste post på turen. Og på vegen kjem vi over ein sel som plaskar og leikar. Han held på ei lang stund før vi vert oppdaga og forsvinn. Ikkje akkurat lett å få dokumentert, men eg gjer no eit forsøk.

Det ER faktisk sel som plaskar!

Siste stopp før vi padlar attende - Marøy tv, Harøya th

Attende til start!

Trass i endring av planar trur eg vi må seie oss fornøgde med turen. 16 km totalt vart det og vi var heldige med været. Eg fekk padla i eit område eg er aldeles ukjend i sjøl om det berre er eit steinkast heime frå. Og her er framleis mykje å utforske. Som sagt ikkje heilt lett å finne teltplass med bil som utgangspunkt, men tenkjer at det vert lettare med kajakk. Berre det ikkje bles for mykje då, altså!