Grasøyane

Det vart lite både padling og skigåing i påska. Lite snø og mykje vind. Då var det sjølvsagt ekstra stas når Joakim inviterer til tur for aktivitetsleiarane ut til Grasøyane. Mellom 15.april og 15 august er der ilandstigingsforbod så dette var siste sjanse før sommaren. Og været - det viste seg frå si beste side. Litt vind skulle det bli i følge meldingane, men sjølv om padleformen og skuldrane ikkje var på sitt beste var konklusjonen at eg nok alltids skulle klare å komme meg både fram og tilbake.

Heile 6 stk klare for tur. Nydeleg i småbåthavna på Flø

Dette er den einaste båthavna eg veit om som er direkte lekker

Mindre vind enn meldt - heldigvis!

I fint driv utover. Godøya i bakgrunnen.

Landkjenning og snart framme!

Turen utover går greit. Vi hadde vinden i ryggen, og det som var av bølger var heilt greit. Det einaste vi måtte passe på var når vi nærma oss grunnene for der reiste sjøen seg ganske bra. Brottpadling stod ikkje på min agenda denne dagen, men litt surfing inn i havna blei det og det var jo berre artig. Ellers varma sola godt i naustveggen og vi tok oss god tid til lunsjen, før vi sjølvsagt måtte opp til fyret å inspisere. Fyr er fantastiske byggverk - tenk alt dei har tolt av vær og vind opp gjennom åra!

Rast i naustveggen. Reine sydenstemninga

Skjelsand er flott!

Grasøyane fyrstasjon, oppretta i 1886 med fyrvokterbustad og fyrtårn

Det ganle fyrtårnet fekk skader under krigen, og vart erstatta av eit nytt i 1950. I støpejern - det sista av sitt slag. 

Så var det å pakke seg ut i kajakken att. Det skulle eigentleg friskne litt til utover ettermiddagen noko som ville bety motvind innover att, men det vart tvert i mot nesten vindstille. Vi lå nok i le av fjella bak Flø for austavinden. Det er berre å merke seg til neste tur.

Tore og Joakim klare for heimfart

Det går radig innover att. Vinden som var meldt viste seg ikkje.

Lene vel fornøgd med å kunne krysse av for eit fyr til i padleboka

Snart tilbake til Flø!

Turen heim gjekk over all forventning. Skuldrane tolte det høveleg bra, men det var greit at det ikkje var motvind og at turen ikkje vart lenger. Pluss i margen til meg sjølv for at eg klarte rulla på første forsøk inne i båthavna att - den satt rett so bra! Ikkje værst ettersom det var eit år sidan forrige rulle! Så ein framragande tur vart det på alle måtar! Takk for tur og kjekt selskap!

Early Bird rundt Eika

Når snøen manglar må ein jo finne på eit kvart anna av utendørsaktivitet, og då passa det jo bra at Johannes inviterte til klubbtur rundt Eika på ein laurdag. Fine meldingar er jo alltid eit pluss, og heile 9 stk møtte morgonfriske opp tidleg (80.30!) i havna på Eiksund.

Litt kaldt og kaldsnekje, men ellers ein nydeleg vintermorgon. Vi for austover først mot Vartdalsfjorden. Det var ganske så frisk sjøgang utpå, men det synes eg det stort sett er akkurat her, for her møter Vartdalsfjorden Voldsfjorden og Rovdefjorden. Og det vert det ganske mykje straum av. Men litt artig er det no og, og Pilgrimmen er ganske god på slikt.

Vi rundar enden på Eika når sola stig over fjelltoppane og drysser gyllent lys på fjelltoppane rundt oss. Og når sjøen har stilna heilt og vatnet er krystallklart så er det ganske lekkert. Bortsett frå at det er litt kaldt å pause på land så tidleg på året, er dette ei fin tid på sjøen. Men det gjeld å kle seg godt, for det vert fort kaldt både på fingrar og tær.

Ettersom aktuelle stader å gå på land for ein beinstrekk framleis ligg i skuggen droppar vi pause. Vi snirklar heller litt rundt før vi kryssar over mot Selvågane der sola er og så attende til havna. Ein fin runde vart det, og veldig kjekt med både tur tidleg på dagen og nye bekjentskap!

Klokka er ca 09.00 og vi er klare for tur!

Vartdalsfjorden byr på rotesjø

Godt i gang, men framleis har ikkje sola stått opp

Snart for enden av Eika, og himmelen byrjar å lysne

Og der skin sola på fjelltoppane bak Selvågane (men ikkje der vi er..) Joakim nyt turen.

Lekkert, sant?

Endeleg i sola!

Så var turen over, og dagen har såvidt begynt!

Klubbtur til Kvitøya

Det har vorte litt lite padling på meg i haust, men nokre turar har det blitt. I slutten av oktober vart det ein fin tur med klubben til Kvitøya.

Arnfinn, Anne-Mette og Mona stilte ved klubbnaustet kl 11. Ikkje eit vindpust og med ei sol som byrja å bryte gjennom skydekket, låg det godt tilrette for ein fin tur.

Framme ved Kvitøya gjekk vi på land for ein liten beinstrekk og lunsj i haustsola. Etterpå vart det litt snirkling mot Tjørvåg, og tilbake gjennom Stokksundet. Og no kunne vi ha padla kortaste vegen tilbake til naustet, men det var så fint og stilt at ingen hadde lyst til å gi seg. Så då vart det ein runde rundt Nautøya i tillegg og ca 15 km totalt før folk sa seg nøgde! 

Flott tur vart det i alle fall, og i framifrå  selskap! Og skuldra klarte turen utan alt for mykje trøbbel, og bra er no det.

Turstart og like før sola bryt gjennom.

Stokksundet

Snart ved Gullura

Arnfinn og Mona i fint driv

Pause på Kvitøya og Anne-Mette er fornøgd!

Pausen er over og vi set kursen mot Tjørvåg

Det er så lekkert så lekkert!

Haust på sjøen er flott når det er slik!

Heimover

Tilbake i Stokksundet

Vi la inn ei ekstra sløyfe rundt Nautøya og.

Langsmed Nautøya

Tilbake mot småbåthavna att

Sjønær 2025

 Sjønær er noko eg etterkvart har byrja å glede meg stort til. Ein bitte liten festival ute på Runde der havet er fellesnevnaren. Hovudaktiviteten har vore under vatn,men det har vore eit ønske å få med kajakkpadling og. Men av ulike årsakar har ikkje kajakkpadlinga teke heilt av.  erOfte det snakk om å få til det rette konseptet, og i år fekk eg drahjelp av ei av dei som skulle halde foredrag på laurdagen - nemleg Kim van Groningen. Også kjent undet navnet Kajakkim på Instagram. Ho er frå Nederland, har budd i Noreg i 20 år +, driv med kajakkguiding rundt om i verda, men har akkurat flytta til Sunnmøre!!

Vi byrja på tankeprossessen tidleg i vår, og etter nokre turar i lag ute ved Runde gjorde vi oss nokre tankar om korleis vi ville ha det. Men å tilby guida turar i løpet av ein festival - der ein til og med må betale - ligg ikkje heilt for Sunnmøringen. Det han då ikkje får med seg, er alt han går glipp av til ein relativt billeg penge.

For ikkje berre har du mogelegheiter til å bli med på ein tur i noko av det råaste som finnes langs Norskekysten, men du får også fantastisk god mat og høyre på historiar frå inspirerande folk, og høve til å prøve både fridykking, padling og coasteering. Alt inkludert i helgepasset.

Fredagen startar sjølvsagt med fredagstaco! Både klassisk variant med kjøttdeig, men Cecil diska sjølvsagt opp med vegetarvarianten og! Nydeleg godt!

Fredagstaco. Foto: Lisa Bendal

Dag 1 - turdag

Inklusive i helgepasset er frukost laurdag og søndag. Heimelaga surdeigsbrød med godt pålegg er faktisk ikkje å forakte. Så med ein solid frukost i skrotten var vi klare for tur. 

Lekkert frukostbord. Foto: Lisa Bendal

Kim og eg hadde håpt på at kajakkfolket tok til årene og meldte seg på tur ettersom det var fine vèrmeldingar. Men den gong ei. I staden for guida tur ved Runde, vart det altså tur ved Runde for guidane. 3 i talet faktisk, for Kom hadde og fått med seg Jorge frå ingen ringare stad enn Mexico. Jorge jobbar som kajakkguide hos Uteguiden i sommarsesongen, og i Mexico resten av året. Men han har forelska seg i Runde, og var ikkje vond å be med som ekstraguide. Dyktig er han og.

Med tett program vart det ikke tid til tur heile vegen rundt, men ut til grottene skulle vi kunne rekke. Eg var ikkje heilt i slaget, men tenkte eg kunne bli med eit stykke i alle fall.

Vi starta i båthavna

Rundebrua

Kim i fint driv utover

Jorge MÅ faktisk leike i kvart eit brott han ser!

Jorge klatrar i BCU-stigen, og øver seg på å trene oss andre. Kjekt!

Det er alltid kult å padle dette stykket her.

Kul geologi!

Eg hadde eigentleg planar om å snu rett etter brua, men eg måtte berre bli med bort til dei kule pinaklane inne i vika før en kjem til lundeura. Etter litt leik og morro mellom steinformasjonane, kjende eg at det var på tide å gi seg. Kim padla med meg tilbake til Måganeset før ho fortsette vidare med dei andre, medan eg snudde nasen heim att.

Snart tilbake til småbåthavna att og lunsj.

Resten av dagen gjekk slag i slag. Foredrag med bl.a Kim som kunne fortelle om guida kajakkturer i Nordnorge, Hellas og Mexico. Swim4fjords viste bilder og fortalte om sin kamp for å sette søkelys på fjordane våre og økosystemene der som er i ferd med å kollapse. Utrolig dyktige og dedikerte folk (følg dei gjerne på Instagram!). For å nevne nokre av foredragshaldarane. Og heilt til slutt vart det tapas og dessert. Etter det gjekk rullegardina ned og det var berre å ta kvelden.

Dag 2 - SundayFunday

SundayFunday er dagen for å prøve ulike vannaktivitetar, og Herøy Kajakklubb stilte sjølsagt opp. I år klarte vi faktisk å lokke nokon frå  dykkegjengen til å prøve og. Og medan Kim tok seg av dei, tok Mads eg eg oss av ungane. Fullt kaos og mykje folk, men utruleg kjekt. Og kjekt hadde dykkegjengen hatt det på padletur og!

Kim instruerer voksengjengen som skal prøve kajakk

Rein sydenstemninga!

Det er alltid ein liten luring som vil teste kor stabil kajakken er..

Det vart litt ordentleg turpadling også på ungane

Alt i alt ei vellukka helg. Eg trur vi fekk framsnakka padling litt betre denne gonge, så får vi håpe då at fleire kajakkfolk finn vegen til neste år!